Аслан Бжьаниа Левенҭ Атрышба идиныҳәалеит Ҭырқәтәыла еиҿкаау акультуратә хеидкылақәа Рфедерациа аиҳабыс иалхра

Апсадгьыл-инфо, 13 ноября 2023 г.  
Аԥсны Аҳәынҭқарра Ахада Аслан Бжьаниа Левенҭ Атрышба идиныҳәалеит Ҭырқәтәыла еиҿкаау аԥсуа культуратә хеидкылақәа Рфедерациа аиҳабыс дахьалырхыз.

Адныҳәалараҿы иаҳәоит: "Ҳаҭыр зқәу,  Левенҭ! Гәык-ҧсык ала ишәыдысныҳәалоит алхрақәа рҟны ижәгаз аиааира. Ҭырқәтәыла еиҿкаау аҧсуа культуратә хеидкылақәа рфедерациа еиҳабыс шәахьалырхыз,  ииашоу ӡбамҭоуп ҳәа сахәаҧшуеит.
Шәара, аҭакҧхықәра ду зцу амаҵзура аныҟәгара,  гәрагарала шәнапы  ианырҵеит.  Аҧсны инхо аҧсуааи,  Ҭырқәтәыла иҟоу ҳџьынџьуааи реимадара уасхырс шәамоуп. Агәыӷра сымоуп, шәдырреи шәҧышәеи ирыбзоураны,  ҳдиаспореи ҳареи ҳаигәныҩра   арӷәӷәара шшәылшо, иара убас Аҧсны Аҳәынҭқарреи  Ҭырқәтәылатәи Ареспубликеи реизыҟазаашьа амҽхак арҭбааразы  ишәылшо зегьы шыҟашәҵо.
Аҧснынтә асалам ду шәзынаҭиуа, ишәзеиӷьасшьарц сҭахуп агәабзиара, агәамч, шәнапы иану аус ҧшьа аҟны аихьӡарақәа!
Шәҭоурыхтә ҧсадгьыл аҟны шәбара ҳаигәырӷьоит!"